Un'elementu antropològicu de significu.

S'apentu pro sa poesia in Sardigna tenet un'isparghidura e una balia antropològica chi si podet cumparare cun àteros pagos cuntestos de s'atividade umana in s'ìsula.
S'apentu pro sa poesia in Sardigna tenet un'isparghidura e una balia antropològica chi si podet cumparare cun àteros pagos cuntestos de s'atividade umana in s'ìsula.
Su de fàghere poesia est una faina chi ammesturat sos sentidos cun s'importu sotziale ca sos messagios chi ispàrghinat tenent significos culturales mannos e ca, impreende sa limba sarda, su ligòngiu s'afòrtigat. Sa poesia duncas s'assentat in giassos de primore de sa cultura sarda. A faeddare de poesia pro sa mùsica in Sardigna, in sensu ampru, est a faeddare de totu sas formas de cantu traditzionale. Sos testos verbales chi s'intonant in su cuntestos de generes tipu su càntigu a chiterra, logudoresu e gadduresu, o in su càntigu a tenore, pro esempru, pro su prus pertocant a sa sienda de poesia, meledada dae printzìpiu in su cuntestu de s'iscritura, dae su Setighentos a oe. Ma a faeddare de poesia cantada, in sensu istrintu, cheret nàrrere a faeddare, dae unu chirru, de sas traditziones de poesia a bolu, a s'àteru de formas poèticas chi, finas si in printzìpiu fiant iscritas, s'impreant mescamente pro las nàrrere a boghe e pro las cantare. Custas, duncas, sena atinare a su pabiru ue benint iscritas, tenent una forma de esistèntzia primàrgia comente poesias de ammentare, poesias de retentiva. De custa filera faghent parte, pro esempru, sas crezes diferentes de cantzones ispainadas in sa leada meridionale de s'ìsula, chi sos testos ammentant e faeddant de fatas ispantosas, cun sa punna de befare o de faeddare male (a s'ispissu sas cantzones s'impreaiant pro atzantarare o tragallare carchi pessone) o fintzas cun intentos morales; sos gosos ("gòcius") cantados in sas ocasiones solennes e sagradas, a tema religiosu, ma impreados finas, che a sas cantones etotu, a manera profana e prus a notu, pro si befare de calicunu; sas modas, cumponimentos chi, pro su prus, restaiant in conca, pro more de una retentiva bona, e chi teniant unu tema mescamente sagradu.
Ma est sa poesia a bolu sa prus primorosa de Sardigna, pro su chi atenet a sa forma, sende chi apentat una cantidade manna de pessones, e sende chi, in sa memòria culturale e in sa conca de sa gente tenet s'importu prus mannu, bidu chi faghet brotare resurtos nòdidos dae su puntu de bista sotziale. Sa poesia a bolu cantada, de unu chirru, s'espressat in formas cullegadas a ocasiones privadas, pagu prus o mancu. Sunt càntigos pro nche drommire criaduras (sas anninnias), cantos pro prànghere mortos (atìtidos), cantos de traballu (cantos a opu, lairellelara), cantos chi tenet su piessignu de sas ocasiones de festas ue s'istat totus paris (trallallera) etc. A s'àteru chirru, sa poesia a bolu e cantada bivet in su cuntestu pùblicu de sa gara de poesia, chi pro su prus si faghet in su matessi perìodu de sas festa religiosa, e in s'òpera de poetas professionistas o semiprofessionistas. Custu tipu de poesia, mentovadu a ùrtimu, finas si oe est iscumparende, est s'isteddu lughente de sa poesia sarda, sa ch'est prus agradessida e sa prus atziva, cudda chi produet sos protzedimentos culturales e sotziales prus de giudu.
Oe in Sardigna tenimus bator traditziones de poesia a bolu cantada. Si distinghent pro sa forma mètrica e musicale impreada, ma finas pro su chi atenet a sa limba impitada, a s'àrea de difusione e a comente benit dadu su tema chi ghiat sa gara pòetica etotu. Pro fàghere un'elencu, sighende sa geografia, dae Nord a Sud, sas taditziones sun cuddas de sa leada tzentru-setentrionale, mescamente in otavas e in limba logudoresa; cudda de sa leada tzentrale, a mutos; cudda de su Campidanu mesanu e de subra, de sa repentina; cudda campidanesa e sulcitana, a mutetu e a versos.

Bibliografia
V. Angius, "Su gli improvvisatori sardi", in Biblioteca Sarda, nn. 3- 5, 8, 1838, 1839;
G. Spano, Ortografia Sarda Nazionale, Cagliari, 1840;
G. Dore, Gosos e Ternuras, Nuoro, Istituto Superiore Regionale Etnografico, 1983-86 (3 tomi in 2 vol.);
G. Solinas, Storia de sa Cantada campidanesa, Cagliari, Castello, 1993;
P. Pillonca, Chent'annos. Cantadores a lughe 'e luna, Cagliari, Soter, 1996;
S. Tola, La poesia dei poveri, Cagliari, AM&D, 1997;
M. Mossa, "L'improvvisazione poetica nel Campidano. Rilievi etnomusicologici", in Quaderni Oristanesi, 43-44, 1999, pp. 57-79;
M. Manca, La poésie pour répondre au hasard, une approche anthropologique des joutes poétiques en Sardaigne, Paris, Universitè Paris X, Thèse de Doctorat, 2002 (è in corso la traduzione italiana);
P. Bravi, "I canti dell'anima. Forme e repertori del canto popolare religioso in Sardegna", in Tracce di Sacro. Percorsi musicali nei canti religiosi della Sardegna, a cura di E. Garau, Cagliari, Condaghes, 2003, pp. 17-33;
G. Mele, "Il canto dei Gòsos tra penisola iberica e Sardegna. Medio Evo, epoca moderna", in I Gòsos: fattore unificante nelle tradizioni culturali e cultuali della Sardegna, a cura di R. Caria, Oristano, Provincia di Oristano, 2003;
M. Lutzu-V. Manconi, In viaggio per la musica, film documentario, Nuoro, ISRE, 2004;
P. Bravi, "Gli attori e i modi del discorso nella cantada campidanesa", in NAE, IV, 10, 2005, pp. 25-31;
S. Pilosu, "Cantare in poesia. La gara poetica logudorese", in NAE, IV, 10, 2005.
P. Zedda-A. Pani, Sa cantada. I poeti improvvisatori, Quartu Sant'Elena, Alfa, 2005.
Si veda anche il sito: Musas e Terras