Santu Lussùrgiu, cantare cun boghes medas

In Santu Lussùrgiu (bidda de belle 2500 abitantes in su Montiferru e in provìntzia de Aristanis) sa costuma de su cantu a cuncordu at tentu unu desvilupu de primore, in intro e in foras de s'istitutzione de sa cunfraria e lompet a chimas de galania musicale desemprada. Sa cantada est semper in bator partes, ognuna contivigiada dae unu cantadore ebbia.
Santu Lussùrgiu, cantare cun boghes medas
In Santu Lussùrgiu (bidda de belle 2500 abitantes in su Montiferru e in provìntzia de Aristanis) sa costuma de su cantu a cuncordu at tentu unu desvilupu de primore, in intro e in foras de s'istitutzione de sa cunfraria e lòmpet a chimas de galania musicale desemprada. Sa cantada est semper in bator partes, ognuna contivigiada dae unu cantadore ebbia. A sas partes, dae s'acutu a su grave, li narant: cuntraltu, boghe, contra e bassu.
In cale si siat ocasione est respetadu, cun cuidadu mannu, s'ordine chi sighit:
- boghe
- contra cuntraltu
- bassu

In generale su repertòriu lussurgesu si podet partzire in tres chirros printzipales:
- branos paralitùrgicos, destinados a èssere cantados in sos ritos de Chida Santa. Faeddamus de su Miserere (Salmu 50, est craru chi tenet su testu in latinu) e de sa Novena (est a nàrrere "Pesadas de nova de sete dolores", istrofas de sa Novena de Nostra Segnora de sos sete dolores), chi est comente a una vulgarizatzione in sardu de su Stabat Mater. Unu cuncordu, seberadu dae su priore de sa confraria de su Rosàriu, su sodalìtziu chi contivìgiat s'ammaniadura de su rituale intreu, s'incurat bene de sa cantada de custos duos branos;partes de s'Ordinarium Missae (Kyrie, Gloria, Credo, Santus e Agnus Dei) chi sunt cantadas a sas tzelebratziones solennes de s'annu litùrgicu, e finas, si lu rechedint, a sas tzelebratziones de cojuos e cando si narant àteras missas de importu. Sa cantada la podent fàghere siat sos cantadores cunfrades, siat àteros cantadores de sa bidda reunidos in grupos assentados bene;
- càntigos cun testu in sardu cun argumentu profanu (s'istudiantina, s'archetutzedda, sa pastorina, s'otava trista) chi non tenent unu piessignu ispetzìficu pro los impreare in ocasiones particulares, ma los cantant sos cunfrades adobiende•si totus paris o in àteras ocasiones cando est totu sa gente de sa bidda chi benit a pare, in dies de festas o adòbios fitianos, o in ocasione de unas cantas atividades tentas a pràtica comente sa catza grussa a su sirbone. Sos càntigos profanos (e prus a notu sas istudiantinas), non dae sos cantadores cunfrades ebbia, ma los cantant finas paritzas chentinas de òmines de sa bidda, de ogni edade e status sotziale.
A prus de custos, su repertòriu incluit finas àteros càntigos de devotzione (comente sos gosos e su nìnnidu) prevididos pro àteras ocasiones religiosas ispetzìficas, pagu prus o mancu. Sos branos chi si cantant pro sos rituales paralitùrgicos los intonat semper su bassu. Totu sos àteros, religiosos e non religiosos, los cumentzat sa boghe.
Oe chi est oe, in sa bidda, bator cunfrarias laicales incurant s'attividade issoro, e tres de custas (Su Rosàriu, Santa Rughe, e S'Addolorada) tenent unu cuncordu e contivìgiant a primore s'atividade de càntigos. Sunt duas sas ocasiones printzipales ue ascurtare totu su repertòriu lussurgesu. De unu chirru sa chida santa, chi previdet eventos rituales piessignados e sonorizados dae su càntigu a cuncordu, su martis santu (ritu de Su Nazarenu, intregadu a sa cunfraria de sa Santa Rughe e a su cuncordu suo), su gioja e mescamente sa chenàbura santa (una die pro s'incravamentu, s'àtera pro s'iscravamentu, chi faghent tra sa crèsia parrochiale e cudda de Santa Maria, sea de sa cunfraria de su Rosàriu, e peri sas carreras de sa bidda). Custos duos ùrtimos eventos rituales rapresentant su mègius de totu su perìodu festivu lussurgesu, atirende s'atentzione de totu sa gente (finas de sos disterrados chi recuint a posta). Dae trinta annos a como intregant s'ammaniadura musicale a unu cuncordu formadu dae sos matessi bator cantadores (Giuanne Ardu est su bassu, Màriu Corona sa contra, Robertu Iriu cuntraltu e Antoni Migheli boghe). De s'àteru chirru b'est su tempus de Carrasegare, e mescamente sas ùrtimas tres dies, a sos concruos de "sa carrela ‘e nanti" (una cursa furiosa de parìllias de caddos peri sas carreras de sa bidda, ripìtida pro tres seros fatu de pare) aberint sas cantinas privadas in sas carreras ue current sas parìllias e sa gente b'intrat pro bìere e cantare istudiantinas e càntigos de su repertòriu profanu. Gasi si formant paritzos cuncordos de bator cantadores, chi sunt cricas de amigos meras e sìncheras e custos, de sighidu, intreverende•si e ammusturende•si tra issos etotu, s'apentant cantende finas a puddiles.


"Miserere" (frammento). Esecuzione Su Cuncordu e Su Rosariu di Santu Lussurgiu. Registrazione di Valter Colle e Renato Morelli edita nel CD: Sardegna. Confraternita delle voci: Santu Lussurgiu, Udine, Nota, 1995, cd 2.18.