Cantu a cuncordu

Che a su càntigu a tenore, finas cuddu a cuncordu est, a s'avesu, a bator partes maschiles, e ognuna est cantada dae unu cantadore ebbia, ma ispetzializadu, chi - pro traditzione - faghet parte de una cunfraria laicale. Su càntigu a cuncordu tenet una sienda e una variedade semper prus mannas de cumbinadas de acordos. Imbetzes tenent diferèntzias s'impostadura de sas boghes.
Che a su càntigu a tenore, finas cuddu a cuncordu est, a s'avesu, a bator partes maschiles, e ognuna est cantada dae unu cantadore ebbia, ma ispetzializadu, chi - pro traditzione - faghet parte de una cunfraria laicale.
Francu sos repertòrios a chimbe partes (comente cuddos de Aggius) e a tres partes (in Bono) chi bi sunt, o chi bi fiant finas a pagu tempus faghet. Su de fàghere parte de una cunfraria, a manera esclusiva, oe costat petzi in pagas biddas, comente in Casteddusardu e Santu Lussùrgiu, mentras chi esistent cantadores annestrados in totu finas sena èssere cunfrades. Est comune, in su càntigu a tenore, sa lògica musicale chi si fundat subra sa sonoridade prena de su sonu majore in positzione de fundamentu (e gasi etotu sunt assentadas sas partes vocales), finas si su càntigu a cuncordu tenet una sienda e una variedade semper prus mannas de cumbinadas de acordos. Imbetzes tenent diferèntzias s'impostadura de sas boghes (prus a notu, in su càntigu a cuncordu non bis sunt sos sonos de gùturu) e su colore chi nde resurtat cumbinende•si. E diferente est finas s'impiantu rìtmicu chi in su cantu a cuncordu est fundadu subra notas longas mantesas, sos valores de sas cales non tenent raportos de proportzionalidade de sa mùsica de arte otzidentale (est a nàrrere sena chi si bi potzat crobare una partzidura regulare).
Tenent una diferèntzia manna finas sas ambientatziones e sas modalidades de sas cantadas. S'ocasione printzipale de su càntigu a cuncordu sunt sos ritos paralitùrgicos de sa Chida Santa e prus a notu sas tzerimònias de sa chenàbura santa. Custos ritos, diferentes dae bidda in bidda, prevident percursos de professone e carchi atzione drammàtica – s'incravamentu e mescamente s'iscravamentu – chi sunt sos momentos printzipales de sa passione. Totu sos momentos de su ritu tenent unu cantu ispetzìficu a cuncordu: a s'avesu sunt versiones locales de su Miserere e de su Stabat Mater. In ogni casu, su càntigu antimat sos logos de su sagradu e istabilit sos tempos de s'atzione rituale, atirende s'atentzione de sos chi leant parte a su ritu e dende unu sensu a s'atzione simbòlica rapresentada.
Sas cantadas rituales de su cuncordu sunt semper reguladas dae normas pretzisas e non si lassat nudda a perisse.Non si podet cantare male, ne unu si podet permìtere libertades prus mannas de cuddas chi previdet sa norma chi totus sighint. Sos cantadores proponent sas cantadas issoro comente chi tèngiant una dèlega chi totus lis ant dadu: sa cantada issoro rapresentat totu sa comunidade chi arresonat cun Deus. Sos impòsitos musicales de sos cantadores incarrigados de fàghere sas cantadas rituales, duncas, sunt sedatzados a prou dae sos chi leant parte a su ritu e sa proa issoro la giùigant in totu sos piessignos e totus nd'arresonant finas in sas dies in fatu. Paris cun sos branos chi cantant pro sa paraliturgia, paritzos repertòrios locales de càntigu a cuncordu incluint sas partes de s' Ordinarium Missae (Kyrie, Gloria, Agnus Dei, Sanctus e a bortas finas su Credo) pro acumpangiare sas missas solennes, argunos càntigos pro àteros ritos e devotziones de s'annu, e in prus, in casu de repertòrios de sas cunfrarias, branos pro sos momentos de prus importu chi atenent a sa bida de su sodalìtziu (su Te Deum pro s'eletzione de su priore nou, sa prima intrada de sos novìtzios e versiones ispetzìficas de su Miserere pro sos ritos de interru. Totu sos repertòrios de càntigu a cuncordu incluende finas branos cun testos non religiosos e de argumentu profanu ma chi semper e cando tenent un'istrutura musicale che pare a cudda de sos branos cun testu religiosu in latinu.Custos branos, a s'avesu non tenent una destinatzione ispetzìfica cuntestuale, e si cantant in sas ocasiones cando sos cantadores s'adòbiant tra issos, in sas rebotas e in sos ispuntinos mannos e cando s'agatant totu paris intro de s'annu.
Paris cun biddas ue tenent a pràtica su càntigu a cuncordu a sighidu fata documentada oramai dae deghènnios (de sas primas Casteddusardu e Santu Lussùrgiu), bi nd'at àteras in ue si sunt bidos (o si sunt bidende) grupos de giòvanos chi torrant a iscobèrrere sas traditziones, a bortas pròpiu cando s'istitutzione de sas cunfrarias torrant a nàschere.
Acò unas cantas localidades in ue, a sos ritos de sa Chida Santa, si podent ascurtare càntigos a cuncordu: Casteddusardu, Santu Lussùrgiu, Cùlleri, Orosei, Aidomagiore, Bùnnanaru, Bortigale, Bosa, Nughedu Santu Nicolò, Galtellì, Bilartzi, Aggiu, Irgoli, Sennarìolo, Tèmpiu Pausània.


"Stabat Mater" (frammento). Esecuzione Confraternita di Santa Croce di Castelsardo. Registrazione di Renato Morelli edita nel CD: Sardegna. Confraternita delle voci: Castelsardo, a cura di P. Sassu, Udine, Nota, 1993, cd 2.07.

Bibliografia
Canti liturgici di tradizione orale, a cura di P. Arcangeli- R. Leydi-R. Morelli-P. Sassu, 4 long playings, alb 21, Milano, Albatros, 1987;
P. Arcangeli-P. Sassu, "Esempi di polivocalità nel repertorio liturgico di tradizione orale in Italia", in Musica e liturgia nella cultura mediterranea, a cura di P. Arcangeli, Firenze, Olschki, 1988;
Su cuncordu, a cura di P. Sassu-R. Morelli, Film documentario, Prod. Rai-Dipt. Scuola Educazione/Sede Rai di Trento, 16 mm., coll. (50 min.), 1988;
Liturgia e paraliturgia nella tradizione orale, a cura di G. Mele-P. Sassu, Cagliari, Universitas, 1992;
Polyphonies de Sardaigne, a cura di B. Lortat Jacob, compact disc, Paris, Le chant du Monde, LDX 274760, 1992;
I. Macchiarella, Il falsobordone fra tradizione orale e tradizione scritta, Lucca, Libreria Musicale Italiana, 1995;
Sardegna. Confraternita delle voci. Santulussurgiu, a cura di P. Sassu-F. Salis-R. Morelli, compact disc, Udine, Nota 2.18, 1995;
B. Lortat Jacob, Canti di Passione, Lucca, Libreria Musicale Italiana, 1996;
Si veda anche il sito del comune di Santulussurgiu