Fìbia in brunzu dae Sestu

Sas fìbias de sa chintòrgia

Sas fìbias de brunzu de chintòrgia agatadas in Sardigna s'assentant in su tempus de su de VI a su de VII sèculos. Pro su prus si podent assentare in sa filera de su tipu de Corinto e de su tipu Balgota, caraterizados dae sa forma de sa placa, su primu triangulare e su segundu a forma de coro, istampada. Sunt manufatos isparghinados in bona parte de su Mediterràneu.
Sas fìbias de brunzu de chintòrgia agatadas in Sardigna s'assentant in su tempus de su de VI a su de VII sèculos.
Pro su prus si podent assentare in sa filera de su tipu de Corinto e de su tipu Balgota, caraterizados dae sa forma de sa placa, su primu triangulare e su segundu a forma de coro, istampada. Sunt manufatos isparghinados in bona parte de su Mediterràneu e produidos in pagas ofitzinas mannas, una de sas cales est belle a seguru Roma.
De su tipu Siracusa, tzerriadu fintzas "a iscudetu" ca si distinghet dae sa placa belle atundulada no istampada, faghet parte sa fìbia de oro de orìgine sarda, oe in Colònia, decorada cun sa figura de "gurtùrgiu". Fintzas su tipu Siracusa fiat essidu dae sas ofitzinas belle a seguru romanas ma in època canteddu prus tarda (sa produtzione sua cumentzat difatis acabende su de VI sèculos) e est isparghinadu siat in su mediterràneu siat in Europa fintzas a s'Inghilterra meridionale.

Paritzas àteras fìbias agatadas in Sardigna sunt de assentare in su tipu Ippona, chi si distinghet dae sa placa chi no est istampada e est atundulada, cun figuras sinnadas pro mèdiu de una tècnica tìpica chi ammentat sa glìtica. Esemplares chi simìgiant los ant sinnalados in cuntestos archeològicos e museales diferentes, tra custos in Roma in s'isfossu de sa Crypta Balbi. Comente sos àteros, su tipu "Ippona" est isparghinadu in totu su Mediterràneu mescamente cussu otzidentale e petzi a raru in àrea transalpina. Meda parìvile, diat pòdere èssere istadu produidu in una ofitzina ebbia, in su casu cussa de sa Crypta Balbi in Roma in sos ùrtimos de tres duos de su VII sèculu. Intre su de VII e VIII s'assentant intames sas fìbias de tipu a "U", difusu in belle totu su Mediterràneu. Si distinghent pro sa placa a "U", prus o mancu longa, in gènere istampada e decorada cun unu repertòriu ampru de motivos geomètricos, fito-zoo-antropomorfos siat sìngulos siat cumbinados in rafiguratziones elaboradas, pro su prus iscenas de cassa.