Trastos chi produent sonos

Sos istrumentos musicales de sa traditzione (e sa mùsica chi lis pertocat) in dies de oe sunt galu afitianados in sas comunidades sardas. Finas a pagu tempus faghet non bi fiat momentu de su tziclu de s'annu e de su tziclu de sa bida ue non s'impreaiat un'istrumentu musicale.
Sos istrumentos musicales de sa traditzione (e sa mùsica chi lis pertocat) in dies de oe sunt galu afitianados in sas comunidades sardas. Finas a pagu tempus faghet non bi fiat momentu de su tziclu de s'annu e de su tziclu de sa bida ue non s'impreaiat un'istrumentu musicale.
Fintzas si sa sotziedade e s'economia sardas sunt mudadas in sos ùrtimos chimbanta annos, in biddas medas, a s'ispissu, agatamus ocasiones, funziones religiosas, festas o sagras de sas biddas, cojuos, adòbios intre amigos e àteras festas, ue s'ascurtant e si bivent cuddas sonoridades de sos istrumentos traditzionales.
Su de connòschere sos istrumentos sebestende•nde sas tècnicas de costrutzione, sos materiales impitados, sas ocasiones de impreu, sos repertòrios, sos sonadores, sa balia e s'isparghidura geogràfica, sa terminologia de su logu e gasi sighende, permitet de compidare a prou de comente una comunidade faghet mùsica. Gasi, in su matessi tempus, si podet analizare s'evolutzione de su sistema econòmicu-sotziale suo, cumprendende duncas sas trasformatziones chi bi sunt in dae segus de sos mudòngios culturales e de sa manera de bìvere.
Ogni bidda tenet carchi istrumentu musicale (e sos repertòrios e sas ocasiones de impreu chi lis pertocat) e los aprètziat comente chi esserent suos, finas si sunt belle che pare a cuddos de sa bidda lacanàrgia. Finas cando s'agatant currispundèntzias organològicas, semper b'ant a èssere piessignos locales chi atenent, si no a àteru, a sas definitziones linguìsticas o a sas paràulas tecnicas ligadas a s'impreu. A esempru sa rana de canna (o de tàula), paris cun sa matraca e sas taulitas, sunt impreadas meda in Chida Santa: cunforma a sa bidda est cramada "arranedda, 'urraiola, furriadorza, furriolu, rana, rèula, riu-rau, stroci arrana, tittiolu, tzacarredda, tzirriaiolu", e gasi sighende. Su matessi pro su "scacciapensieri", istrumentu impreadu galu meda in totu sa Sardigna, chi tenet nùmenes diferentes: "trunfa, trumba, chitarredda a buca, sona•sona, tzampurra, biurdana, ribelvia" etc.
Paritzos istrumentos chi sunt iscumpartos in s'àmbitu de sa mùsica traditzionale benint impreados in sos ispetàculos de folclore o in àteros gèneres musicales (tipu su jazz, sa world music). In sas festas patronales, in sas festas campinas e a Carrasegare, in biddas medas de Sardigna, est normale in totu a ascurtare mùsicas istrumentales. Sas ocasiones leadas a preferu sunt sas sagras mannas regionales ue s'adòbiant sos grupos folclòricos, comente sa sagra de Santu Efis in Casteddu (1 de maju), Sa Cavalcada Sarda de Tàtari (sa penùrtima domìniga de maju), sa sagra de su Redentore in Nùgoro (sa penùrtima domìniga de austu), sa sagra de sos agrùmenes de Muravera (metade de Abrile). Sunt annoditadas sas regortas de istrumentos musicales sardos in Nùgoro, costoidas in su Museu de sa Bida e de sas Traditziones Populares Sardas e in Tadasuni, in su Museu privadu "don Giovanni Dore". In prus, paritzos istrumentos sardos sunt costoidos in sa Discoteca de Istadu de Roma.

Consulta la scheda del Museo della Vita e delle Tradizioni Popolari Sarde di Nuoro
Consulta la scheda del Museo Don Giovanni Dore di Tadasuni
Visita il sito della Discoteca di Stato di Roma

Bibliografia
G. Dore, Gli strumenti della musica popolare della Sardegna, Cagliari, 3T, 1976;
Sonos. Strumenti della musica popolare sarda, a cura di G.N. Spanu, Nuoro, ISRE-Ilisso, 1994 (con CD allegato).