Testos de tzeràmica dae Ollolai

Sa tzeràmica nuràgica

Finas in edade nuràgica sa tzeràmica tenet unu ruolu de primore pro su chi pertocat sas produtziones materiales. Dae sa prima cumparta in su Neolìticu, sa produtzione de istèrgios in tzeràmica s'est semper desvilupada cunforma a sas esigèntzias. Custas fiant ligadas a su sistema de bida chi sighiat su binòmiu agricoltura/allevamentu.
Comente giai in sas culturas prenuràgicas, finas in edade nuràgica sa tzeràmica tenet unu ruolu de primore in su cuadru de sa produtzione materiale.

Difatis, dae sa prima cumparta sua in su Neolìticu, sa produtzione de istèrgios de tzeràmica s'est semper desvilupada cunforma a sas esigèntzias nàschidas a pitzu de su sistema de bida, reguladu dae su binòmiu agricoltura/allevamentu.

Finas s'economia nuràgica, a seguru, agataiat sustentu isfrutende bene sas resursas de su territòriu de s'ìsula, e siat s'agricoltura, siat s'allevamentu, depiant tènnere una funtzione de importu mannu in su sistema econòmicu. No est duncas un'ispantu chi, finas in edade nuràgica, si produiant istèrgios in tzeràmica .

Custas produtziones sighint un'àndala de evolutzione chi paret parìvile cunforma a su desvilupu cumplessivu suo, finas si non si podet dennegare sa distàntzia manna de sos sinnos formales e decorativos chi marcant sas produtziones de sas fases prus antigas de s'edade nuràgica e cussas prus reghentes.

Su chi meresset de èssere annoditadu est su fatu chi sa tzivilidade nuràgica fiat lòmpida a produire una gamma ampra de formas vasculares: giros, padeddas, ischiveddas, tzicherones, tatzas, tianos, istèrgios pro buddire, calefatojos o forreddos, testos ascoides, lugherras, etz.

Custa abundàntzia de formas, in sa produtzione de tzeràmicas, rapresentat giai un'informatzione pretziada, pro cantu si potzat interpretare comente riflessu de sas netzessidades. Custas fiant crèschidas ca si fiat ismanniadu su gradu de cumplessidade de sas maneras de bìvere a sos tempos de sos nuràgicos, siat dae unu bessu econòmicu siat dae unu bessu sotziale.

Sugùgiant atentu mannu fintzas sos piessinnos tecnològicos chi nd'essint a pìgiu dae s'anàlisi de sos manufatos de tzeràmica de edade nuràgica. Difatis, fintzas si est craru chi mudant cunforma a s'impitu e a sa fase cronològica, custas produtziones demustrant s'achirimentu in àmbitu nuràgicu de istandard primorosos de calidade e semper prus connòschidos.