Fèmina tessende

Sas tècnicas de tessidura

Sa tècnica de tessidura chi distinghet sos manufatos tessìngios in su telàrgiu a istoja est sa tessidura est sa tessidura prana cun ordìngiu a bista. Si faghet ponende sos filos de ordìngiu chi si màgiant a forte subra sos filos de ordidu fintzas a nche los tutare de su totu. Bidu chi su colore de su tessìngiu est in custu casu dadu dae sos filos de ordìngiu ebbia, s'ordidu podet èssere de colore diferente, a unu colore, pintirinadu o grezu. Sos distacos cromàticos intre colores serentes s'otenent impreende tècnicas diferentes.

Sa tessidura a bagas si distinghet pro unu traucu verticale piticu in ue s'ispìtzigant sos duos colores. Pro su prus sos motivos decorativos prevident una longària de bagas limitada; cando sos ispìtzigos de colore creant a raru bagas tropu longas, si firmant cun puntos de renfortzu a pustis. Custa tècnica de tessidura est tìpica de sa produtzione de sos tapetos fùnebres mutidos "tapinu de mortu" ma s'impitat fintzas pro creare motivos decorativos piticos de sas mantas traditzionales de unas cantas localidades de sa Sardigna tzentrale.

Sa tessidura "a coa de rùndine" si distinghet ca, a onni càmbiu de colore in longu, onni cursu de sa trama imbòligat su primu filu de s'ordidu cun un'àteru colore cumpartzende∙lu a cursos intreverados cun sas tramas de colore diferente. In custa manera non si creant bagas e su tessìngiu resultat cumpatu e a cara dòpia de su totu, sende chi su disignu abarrat prus pagu ladinu in sos brincos cromàticos.

In sa tessidura a "puntu a tracu" connota fintzas comente "a manu tenta" sas tramas s'intritzint a ifache de su tessìngiu intre sas duas cadenas de ordidu chi alindant sos càmbios de sos duos blocos de colore. In custa manera si creat unu cordone, a ifache de su tessìngiu, oru•oru de sa lìnia de làcana de sos colores; s'istrutura est firma meda e su rodeu de su disignu est craru meda in sa fache de su traballu. Custa tècnica fiat caraterìstica de sos manufatos antigos de Nule in ue l'ant cambiada, moende dae su 1960, in favore de cussa "a coa de rùndine".