G. Marghinotti, Càrolu Felitze generosu protetore de sas Bellas Artes, 1830

S'Otighentos

S'Otighentos, a prus chi pro su dramma sagradu, est finas pro sa produtzione teatrale profana chi si piessinnat, in prosa e in mùsica. Sos testos diferentes s'intrèverant: de ambientatzione sarda o italiana, de tema istòricu o de amore. Essint a pìgiu duos autores de drammas: M. Vinelli cun "La ragione del fucile", dramma de su 1891, e A. Garzes, atore e fìgiu "d'arte", cun "In Gallura".
S'Otighentos, a prus chi pro su dramma sagradu, est finas pro sa produtzione teatrale profana chi si piessinnat, in prosa e in mùsica.
In Casteddu sos teatros fiant in su 1750 su Teatru de s'Universidade, duncas, in su 1767, su Teatru Lasplassas o Règiu, posca, in su 1831, su Teatru Tzìvicu; e - sighende - su Teatru Craboni e su "Nuovo Diurno" chi in su tempus in fatu s'at a cramare "Cerruti" e a pustis "Politeama Regina Margherita". In Tàtari fiant ativos su Tzìvicu e su Politeama. In cue si rapresentaiant commèdias de argomentu sardu, o basadas subra s'intretzidura clàssica de amore a tres e ambientada in sa sotziedade, drammones istòricos, commèdias ispassiosas, melodrammas e farsas brulleras in mùsica. Sos testos diferentes s'intrèverant: de ambientatzione sarda o italiana, de tema istòricu o de amore.

Pro su chi atenet a sos drammas, essint a pìgiu duos autores: Martzellu Vinelli cun "La ragione del fucile", dramma de su 1891, e Arturo Garzes, atore e fìgiu "d'arte", cun "In Gallura", istòria iscurigosa de ricatos e sàmbene in su 1890. Pro s'intretzidura clàssica de amore o pro sas temàticas pro su prus sotziales si podent mentovare Otone Bacaredda cun "Amico d'infanzia", cummèdia de su 1879, e Giuanne Siotto Pintor cun su dramma "Il ridicolo", de su 1875. Pro sos drammas istòricos si podent ammentare tre òperas de argumentu sardu de Giuanne Baraca: "Tigellio", "Angioi" e "Il Marchese di Cea". Intre sos àteros nùmenes de giudu non sunt de olvidare Sarbadore Farina, figura nòdida in su panorama literàriu italianu de su segundu Otighentos, cun "Amore cieco" e "Bugie senza peccato", e Micheli Uda, artista chi non fiat de mancu preju in su cuntestu de sa Scapigliatura lombardo-piemontesa, cun "Gli spostati", commèdia de su 1859 e cun "Volto e maschera" de su 1858. In su gènere còmicu-legeru, chi tenet una cantidade prus mannas de òperas, si podent ammentare "Il tesoro delle famiglie", commèdia de Enricu Costa del 1871 e "Feliciana, ossia la ribellione delle mogli", una cummèdia de Giuanne Siotto Pintor de su 1878. Esempru de melodrammas sunt "Amsicora", librigheddu de Austinu Airaldo e mùsica de Nicolò Oneto; "I briganti" de su 1837, librigheddu di Iacopo Crescini, mùsica de Savèriu Mercadante.
Mentras, a sas commèdias brullanas apartenent "Chi dell'altrui si veste presto si spoglia" de su 1804, librigheddu de Giusepe Palomba, mùsica de Domìnigu Cimarosa, e "L'antiquario" de su 1882, librigheddu de Felitze Uda, mùsica de Giuanne Batista Dessì.