Sa fotografia in Sardigna

In dies de oe est oramai ladinu s'interessamentu de amantiosos, istudiosos, iscola e universidade a su materiale fotogràficu chi atenet a sa Sardigna. Difatis, s'immàgine fotogràfica cuntenet una filera de informatziones ogetivas de balia desemprada e de un' importu chi non si podet istransire si si cheret connòschere e istudiare su passadu nostru e sa cultura nostra.
Est però difìtzile a las àere a disponimentu e a las bìdere totus paris, ca sas fotografias sunt costoidas in chentinas de archìvios, pùblicos e privados, non petzi sardos o italianos ma finas europeos e americanos, ue sa gente non semper podet intrare. Un'àteru piessignu de pònnere in contu, cando si faeddat de s'ogetu "fotografia", est chi est dìliga meda e chi si fràgiat: totu sos protzedimentos fotogràficos, antigos e modernos, contivigiados belle che a prou, non podent assegurare sa dura de s'immàgine prus de unu tantu de tempus, in su cale custa est sutaposta a alteratziones chìmicas chi nde cajonant -a bellu a bellu- e sena lu pòdere istransire, s'iscumparta. In prus, custu protzedimentu podet èssere illestridu dae fatores atzidentales, prus fitianos de su chi si creet, comente metodologias de archiviatzione faddidas, incuinamentu, fogos, aundamentos o àteru.
S'ischirriada, sa reprodutzione e s'archiviatzione in suportu digitale, acumpridas cun sas mègius tecnologias oe a disponimentu, e cunforma a sos critèrios prus impreados, podent nessi sarbare s'elementu iconogràficu, a prus de fatzilitare sa consultatzione, s'istùdiu e s'impreu didàticu e editoriale.
Iscumproende sa cantidade desemprada de materiale fotogràficu chi b'est subra sa Sardigna, a bortas a incuru de sos nùmenes prus nòdidos de sa fotografia, e sebestende sa variedade de temas atesos, nos podimus sapire de s'importu chi tenet non petzi in s'ìsula, ma fintzas in Itàlia e in sas àteras natziones.