Ladinu

Cun ladinu si definint totu sas faeddadas romanzas traditzionales de s'àrea dolomìtica, in sas provìntzias de Bolzano, Trento e Belluno.
Sas populatziones de sas baddes ladinas ant bìvidu semper in cunditzione de bilinguismu e de plurilinguismu, seberende de impreare de borta in borta, comente limbas de cultura, su tedescu (in Alto Adige) o s'italianu (in su Trentinu e in Cadore). In Artu Àdige sunt de tipu ladinu sas faeddadas de Ortisei, Santa Cristina e Selva in Val Gardena; de San Martino, Corvara, Badia, La Valle e Marebbe in Val Badia. In Trentinu, si cunsiderat a manera crara ladina sa Val di Fassa ebbia. Pro su chi atenet a su Veneto (provìntzia de Belluno) bisòngiat de cunsiderare a parte sa positzione de sos tzentros de Livinallongo, Col di Lana, Colle Santa Lucia e Cortina d'Ampezzo.

Àteros dialetos in manera verdadera ladinos (sutavariedade cadorina) si faeddant in Danta di Cadore, San Vito di Cadore, Lozzo di Cadore, Auronzo di Cadore, San Pietro di Cadore, Borca di Cadore, Vodo di Cadore, Lorenzago di Cadore, Vigo di Cadore, Rocca Pietore e Pieve di Cadore, su cabu de logu de sos cales est venetizadu. Sa populatzione cumplessiva de sas baddes ladinas de s'Artu Àdige fiat in su 1991 de 18.412 abitantes, su 90% de sos cales aiat decraradu de apartènnere a su grupu linguìsticu ladinu. Pro su chi pertocat sa Val di Fassa, dae un'inchesta de su 1995, resurtat chi su 96,3% decrarat de cumprèndere su ladinu. Pro sa provìntzia de Belluno si podet carculare chi siat belle 30/35.000 unidades su nùmeru de sas pessones de limba mama ladina in totu su territòriu interessadu.