Logo Regione Autonoma della Sardegna
SOS BENES CULTURALES DE SA SARDIGNA
sardegnacultura  ›  limba sarda  ›  limbas de minoria in s'unione europea  ›  limbas de minoria in s'europa otzidentale  ›  romantzu

Romantzu

Su romantzu est una limba neolatina, parente largana de su ladinu e de su friulanu, chi si faeddat in Isvìtzera, a dies de oe petzi in unos cantos territòrios isolados de su cantone isvìtzeru de sos Grigiones.
Est dae su 1938 sa de bator limbas natzionales de s'Isvìtzera, mancari chi a printzìpiu non teniat caràtere de limba ufitziale. Cun sa costitutzione federale isvìtzera noa de su 1999, sa limba at otentu como su ruolu de limba amministrativa. Pro custu su romantzu est insignadu e imparadu immoe in sas iscolas de sos Grigiones e in custa limba s'agatant fintzas programmas televisivos e giornales. In orìgine su territòriu atuale fiat de sos Tzeltos e, forsis in sa parte orientale de sos Grigiones ebbia, de sos Retos. Custos pòpulos fiant istados sutamissos in su 15 a. C., a su tempus de sa campagna de sas Alpes dae sos romanos, chi nche aiant batidu su latinu in cussu territòriu (pro su prus in sa forma semplificada faeddada dae su pòpulu e dae sos militares).

Non s'ischit cantu a sa lestra sa regione fiat istada romanizada. In finitia de s'antighidade, sas connoschèntzias linguìsticas preromanas si fiant pèrdidas e abarraiant petzi pagos prèstidos in latinu provintziale. A cumentzare dae su de VIII-IX sèculos sa regione aiat connotu s'influèntzia germànica. Colende su tempus, su tedescu fiat divenidu a manera progressiva limba ufitziale, mentres su romantzu si carculaiat a ghisa de "limba de sos massajos". A bisu de su tzensimentu isvìtzeru, in su 1990 bi fiant galu 66.356 pessones chi costumaiant a faeddare su romantzu, de sos cales 39.632 comente "lingua madre". In su 2000 petzi 35.100 pessones ant afirmadu de faeddare su romantzu comente limba printzipale.

Patrimonio culturale della Sardegna