Logo Regione Autonoma della Sardegna
SOS BENES CULTURALES DE SA SARDIGNA
sardegnacultura  ›  limba sarda  ›  limbas de minoria in s'unione europea  ›  limbas de minoria in s'europa otzidentale  ›  frisian

Frisian

Su frisone est una limba germànica faeddada dae belle mesu millione de pessones in sa costera meridionale de su Mare de su Nord in sos Paisos Bassos e in Germània.
Si tratat de sa limba chi assimìgiat de prus a s'inglesu intre sas chi s'agatant a dies de oe. Si distinghet in tres famìlias de dialetos: setentrionale, orientale e otzidentale. Su frisone setentrionale est faeddadu in Germània in unos cantos logos de sa Frìsia setentrionale (Nordfriesland, in sa costera otzidentale de su Scheswig-Holstein). Prus a notu, sa limba "frisian" est galu faeddada in sas ìsulas de Sylt. Amrum, Föhr e in unas cantas isuleddas a curtzu. In s'ala danesa de sa Frìsia setentrionale, sa limba est belle de su totu estinta. Su frisone orientale est su dialetu chi prus s'agatat in abbas malas e est faeddadu petzi (cun su nùmene de Saterfriesisch) in sa comuna de Saterland in Bassa Sassonia dae belle 1.000.-2.500 pessones. Su frisone, in sa Frìsia orientale, est estintu.

Sa variedade prus biatza est cudda de su frìsian otzidentale, faeddadu in sos Paisos Bassos a curtzu de Leeuwarden dae agiomai 440.000 pessones. De custas, 350.000 sunt de limba mama frisona. Su frìsian otzidentale est reconnotu e tuteladu giai dae su 1956. Sa provìntzia de Frìsia etotu at cambiadu in su 1997 sa denominatzione sua ufitziale, passende dae s'olandesu "Friesland" a su frisone "Fryslân". De non cunfùndere cun su frisian est su chi si narat "Standsfrieso Stadsfrys" ("frìsian de tzitade"), chi est una variante de sa limba olandesa arraighinada in sas tzitades prus mannas de sa Frìsia otzidentale giai dae su de XV sèculos.
Patrimonio culturale della Sardegna