Logo Regione Autonoma della Sardegna
SOS BENES CULTURALES DE SA SARDIGNA
sardegnacultura  ›  limba sarda  ›  limbas de minoria in s'unione europea  ›  limbas de minoria in s'europa otzidentale  ›  corsicanu

Corsicanu

Su corsicanu, idioma orale fintzas a pagu tempus a como, est sa faeddada de sa Còrsica, oe a manera definitiva catalogada intre sas 14 limbas romanzas.
Ma si apartenet, sena dudas, a su grupu ìtalo-romanzu, s'evolutzione sua resurtat mala a ischematizare. Protzedit dae su de IX sèculos sa partzidura linguìstica-culturale "sardo/corsa" e s'influèntzia semper prus manna de su toscanu, nointames sa dominatzione istentosa de sos genovesos in s'ìsula. Ma sos genovesos fiant prus interessados a sos aspetos econòmicos chi no a cuddos culturales, a s'imbesse de sos frantzesos chi aiant impostu sa limba issoro cun una polìtica forte de frantzesizatzione pro mèdiu de s'iscola e s'emigratzione coloniale. Su corsicanu est sena dudas parente de argunos dialetos meridionales italianos comente su calabresu, ma est mescamente a su gadduresu chi su corsicanu meridionale est serente. S'agatant in Còrsica puru "enclaves" linguìsticas curiosas: lìgure in Bonifacio e Calvi, mentres in Cargese (ex Paomia fundada dae èsules grecos) est su grecu a àere lassadu istigas in sos sambenados e in sa liturgia.

Dae su de XIX sèculos est su frantzesu, sa "Lingua del Pane", chi aiat contribuidu a pònnere su corsicanu in cunditzione de dialetu faeddadu mescamente in sas biddas de monte. Fiat in sos annos setanta de su sèculu passadu, annos de su "Riacquistu", chi fiat nàschidu unu movimentu culturale de intragnas natzionalistas, chi punnaiat a dare torra balia a sa cultura corsicana printzipiende dae sa limba. Oe s'Assemblea de Còrsica, in una delìbera de su mese de trìulas de su 2005, pro definire sos orientamentos istratègicos fache a sa difusione de sa limba corsicana, la definit comente "sa base e su vetore prus mannu de sa cultura nostra [...] sentida dae sos corsicanos comente chi non si potzat ischirriare dae s'identidade".

Patrimonio culturale della Sardegna