Progetos culturales

Sa lege regionale 26/97 tratat mescamente de sos aspetos culturales de sa difusione de sa cultura e de sa limba sarda. In custu sensu, in su primu annu de aplicatzione de sa lege s'est intervènnidu in manera particulare a favore de entes, universidades, sòtzios e finas istudiosos sìngulos, pro isvilupare su sensu de identidade de sa comunidade sarda.

In particulare, s'artìculu 13 de sa lege, basènde•si subra su pianu triennale de interventos, cuntzedet a sugetos chi òperant in su setore culturale contributos finantziàrios. A unu chirru si favoresset sa regorta, s'ordinamentu e s'anàlisi de totu sas caraterìsticas de sa realidade culturale de Sardigna, dae s'àteru sa chirca e sa regorta de su patrimòniu de sa cultura populare e de sa traditzione orale de Sardigna. E in prus si sustenet sa cunservatzione e s'achirimentu de ogetos e elaborados chi atenent a sa cultura sarda.

Atentu mannu si dat a s'organizatzione de cuncursos e prèmios a iscritos in prosa, poesia e càntigos in limba sarda, pro sa mùsica, sa sagìstica e sa chirca iscientìfica in Sardigna, e s'organizatzione de manifestatziones chi tèngiant comente iscopu sa difusione de sa connoschèntzia de s'ìsula e de sa tzivilidade sarda, in totu sas espressadas suas materiales e ispirituales. Ma finas, pro su chi atenet a s'istòria, sa regorta, sa catalogatzione e s'archiviatzione de sa documentatzione istòrica chi pertocat a sa Sardigna; sa chirca, su recùperu, sa trascritzione e sa divulgatzione de materiales documentales arrimados in archìvios in s'èsteru chi tèngiant atinèntzia a s'istòria sarda.