Progetos subra sos mass mèdia

S'artìculu 14 de sa lege regionale 26/97 finàntziat progetos de comunicatzione chi pertocant sos mèdios massivos in limba sarda. In particulare sa Regione agiudat cun contributos finantziàrios, finas cun conventziones e partetzipatzione in sotziedade, a sa produtzione e a sa difusione de programmas radiofònicos e televisivos, comente puru a sas publicatziones in giornales in limba sarda.

Sos programmas e sas publicatziones sunt sa tradutzione operativa de progetos culturales ispetzìficos presentados dae sugetos pùblicos o privados, bastis chi siant atinentes a sos obietivos indicados dae su Pianu triennale.

Sos interventos, cumentzende dae su 1999, ant pertocadu televisiones, ràdios, giornales, diàrios cuotidianos, rivistas, periòdicos e sitos internet chi si sunt acostados a sa Sardigna pro realizare produtziones in limba sarda.

In su 2002 s'Assessoradu Regionale de sa Istrutzione Pùblica, Benes Culturales, Informatzione, Isport e Ispetàculu, aiat commissionadu unu primu monitoràgiu subra sos resurtados de custa atividade chi aiat postu in campu mescamente s'importàntzia de unas cantas trasmissiones televisivas de emitentes difusas in Sardigna. In particulare si fiat distinta Sardegna Uno cun s'editzione de telegiornales in sardu e cun sa rubrica "S'arrejonada".