Progetos de istrutzione iscolàstica

Si podent realizare progetos isperimentales de istrutzione iscolàstica in limba sarda (o in àteras limbas o dialetos o idiomas de Sardigna) servènde·si de sas possibilidades chi dant sa lege regionale 26/97 e sa lege istatale 482/99.

Pro sa lege regionale sa matèria est regulada dae sos artìculos presentes in su de bator tìtulos chi règulant s'andamentu regulare de progetos de insinnamentu e creatzione de istrumentos didàticos in sas iscolas. Si nde leat incuru deretu su Servìtziu Limba Sarda in s'Assessoradu Regionale de sa Cultura.

S'imparu de sa limba no est curricularizadu nen faghet parte de sos programmas iscolàsticos ufitziales. Sa regione finàntziat atividades agiuntivas chi cumportant s'istùdiu de sa limba, ma finas programmas culturales prus generales chi atenent a sa cultura sarda.

Esistet un'atentu mannu pro s'istùdiu de sas variedades locales. A su pròpiu tempus si podent finantziare progetos chi cuntzernent sos àteros idiomas presentes in s'ìsula, in relatzione a sos territòrios de difusione. Su Catalanu in s'Alighera, su lìgure-tabarchinu in Carloforte e Calasetta, su turritanu in su tataresu, su gadduresu in Gaddura.

Sos progetos de sa 482/99 chi atenent a s'istrutzione sunt in tames gestidos e finantziados dae su ministèriu de s'Istrutzione in Roma e punnant prus a sa realidade linguìstica ispetzìfica de su sardu e de su catalanu chi sunt sas limbas de minoria istòricas chi s'istadu italianu reconnoschet in Sardigna.