Istrumentos giurìdicos pro sa promotzione de sa limba sarda

S'Istatutu Ispetziale atuale de sa Regione Sardigna, aprovadu in su 1948, non faghet perunu riferimentu a s'identidade linguìstica de sa Sardigna. Sos tempos non fiant galu bonos pro chi s'esseret leadu in contu unu problema de cussa genia.

Sa cussèntzia linguìstica populare si nd' "ischidat" mescamente in sos annos Setanta de su sèculu passadu cando Antoni Simon Mossa ponet su problema a livellu polìticu. Ma una proposta de lege de initziativa populare de su 1978, sustènnida dae deghinas de mìgia de firmas, no aiat otentu risposta dae sas istitutziones istatales e regionales si no in su 1997 cun s'aprovatzione de sa lege regionale 26. In s'interi, in su 1990, s'ordinamentu nou de sas autonomias locales cunsentit a provìntzias e comunas de reconnòschere sa limba sarda cale limba de su territòriu e de sas istitutziones locales.

S'aprovatzione de sa Carta Europea de sas Limbas, in su 1992, aberit prospetivas noas finas in Itàlia chi, in su 1999, aprovat sa lege n. 482 chi nche ponet su sardu cale "limba de minoria istòrica" reconnota in su territòriu natzionale totu paris cun su catalanu, croatu, otzitanu, francoproventzale, friulanu, grecànicu, albanesu. Custu in atuatzione de s'artìculu 6 de sa Costitutzione Republicana chi afirmaiat, giai 50 annos a como, de tutelare sas minorias linguìsticas.

Oe, in Sardigna, pro sa tutela de sa limba sarda si faghet ricursu a una genia de "combinato-disposto" intre sa lege istatale 482/99 chi s'òcupat mescamente de s'Amministratzione Pùblica (in parte mìnima de mèdia e de iscolas), e sa lege regionale 26 chi s'òcupat in màssima parte de progetos culturales (ma finas de mèdia e de isperimentatzione iscolàstica).

Lege regionale 26/1997

Acordu de Programma Cuadru Istadu-Regione 1999

Pianu Triennale RAS – 2005-2007