Semèstene, crèsia romànica de Santu Nigolau de Trullas, post 1113

Sos Condaghes

Sos Condaghes, iscritos intre su de XI e su de XIII sèculos, sunt tra sas primas testimonias de su vulgare sardu. Sunt còdighes manoscritos in pergamena, chi documentant donatziones e situatziones patrimoniales de crèsias o comunidades religiosas.
In orìgine (moende dae su perìodu bizantinu) fiant registros patrimoniales cumpilados in forma de ischedas cosidas s'una a pare e a pustis imboligadas a fùrriu de unu matzucu (in grecu "kontakion", dae ue arribat su tèrmine "condaghe"). In època medievale dae su matzucu si colat a su libru, ma su tèrmine in carchi manera est abarradu. Tra sos prus connotos ammentamus su Condaghe de Santu Pedru de Silki, in ue sos atos prus antigos, copiados in su 1150-80, sunt de unu sèculu in antis; su Condaghe de Santu Nigolau de Trullas, in ue sos atos registrados diant dèpere èssere de su 1115-76, ma cun un'istèrrida datada cara a su de XII sèculos; su Condaghe de Santa Maria de Bonarcado, in variedade arboresa, in ue sunt presentes partes antigas chi sunt de sos annos 1120-46; su Condaghe de Santu Miali de Salvenor, chi nos est lòmpidu in una tradutzione ispanniola prus reghente. Su Condaghe de s'ospidale de Santu Lenardu de Bosove est s'ùnicu registru làicu in limba sarda arribadu finas a sos tempos nostros. Custu regollit sos atos de sas donatziones de su giùighe Barisone II de Turres in favore de unu lebrosàriu.

MONOGRAFIAS
Condaghe de Santu Nigolau de Trullas
Condaghe de Santa Maria de Bonarcado