Su tabarchinu

Esempru tìpicu de eteroglossia interna - comente iscriet s'istudiosu Fiorenzo Toso – su tabarchinu est una variedade de genovesu tramudada a primu (su de XVI sec.) in s'ìsula de Tabarca in Tunisia, e pustis pastinada in Sardigna in is seas in ue est como.
In su matessi tempus, su tabarchinu dd'aiant impiantadu finas in s'ìsula de Nueva Tabarca (Alicante, Ispagna), in ue però resurtat iscumpartu dae su cumentzu de su de XX sèculos. In Sardigna est faeddadu in is comunas de Carloforte (L'Uîza) e Cadesedda (Câdesedda), a manera rispetiva is sas ìsulas de Santu Pedru (San Pê) e Santu Antiogu (Sant'Antiócu) in sa Sardigna sud-otzidentale. Totu sa populatzione de is duas comunas est de belle 10.000 unidades e, a su chi narant is istimas locales, prus de s'80%, costumat a faeddare su tabarchinu. Custa variante de sa limba lìgure, pastinada in s'ìsula dae is Savoia, godit de una carchi tutela in intro de sa Regione Sardigna pro more de sa lege regionale n. 26 de su 15 de santugaine 1997. Non l'ant reconnota imbetzes, a manera parìvile de su sardu e de su catalanu de s'Alighera, cun sa lege 482 de su 1999. Is istatutos comunales de Carloforte e Cadesedda previdint de faeddare in pùblicu su tabarchinu, pro esempru in is setziadas de is Consìgios Comunales. Mancari chi non siat galu in forma ufitziale, su tabarchinu faeddadu tenet un'impreu fitianu in totu is situatziones pùblicas e in is raportos intre is tzitadinos e is istitutziones. Gasi e totu, mancari non siat galu a manera ufitziale, si costumat a impreare su tabarchinu contivigiende·ddu in is atividades didàticas de is iscolas maternas, elementares e mèdias de is duas comunas.