Pepinu Mereu

In su pagu chi est bìvidu, Pepinu Mereu at iscritu meda: cun realismu e sàtira crispa at sedatzadu onni genia de ambiente de s'ìsula, onni situatzione emotiva iscriende versos agudos, imàgines ùnicas e atrividas pro cussos tempos.
Fiat nàschidu in Tonara, in su 1872, in una famìlia mavele. Òrfanu de babbu e mama, su de bator de sete frades, fiat istadu carabineri pro netzessidade. Aiat traballadu pro bator annos in paritzos logos de Sardigna, fintzas a cando, malàidu, fiat torradu a bidda sua, in ue fiat mortu in su 1901.
Issu si nche illargat dae sos ischemas de s'Arcàdia e dae sa poesia a bolu. Iscritore de frontera, refudat sa puresa "finta" de su logudoresu arcàdicu pro l'ammesturare cun sa richesa lessicale de totu su sardu e cun s'italianu. A dae segus de su tzinismu aparente, presentaiat unu fundu de tristesa. Pro definire sa poesia sua s'ammentant sos poetas "bohémiens", s'iscapigliatura, sos "poetas maladitos".
Pessonàgiu cumplessu (sos de bidda sua li naraiant "Su misteriosu"), Mereu pro sos sardos est mescamente s'autore de “Nanneddu meu”, chi in pagu prus de trinta còbulos resumet s'istadu de s'ànimu de sos Sardos fache a sos cambiamentos sotziales. S'òpera sua diat èssere abarrada belle isconnota si Nanni Sulis, a su cale fiat istadu dedicadu su cumponimentu, no àeret trascritu sas poesias suas prus bellas contra sa voluntade matessi de "Su misteriosu".

ÒPERAS
Poesias
Poesie complete

elencu cumpletu