burattini - unità 13

Mussi e Chica: sa castanza

Chica Semus in atonzu... tempus de castanza, de méndula e de nuche...
Mussi Ando deo a su cunzau a collire castanza.
Chica Bae, bae... e torra impresse!
Mussi (torrat miaulande) Ohi! Mi-mi-mi-miauuu...
Chica Ite b'at, Mussi?
Mussi Sa-sa-sas ispinas in sa li-li-limba...mi-mi-mi-mi-mi-mi-muiauuu...
Chica Ma tue maccu ses a ti pònner in bucca sa castanza chin su corju? Limbichéchinu puru ses commo!
Mussi Li-li-limbicheche as a esser tue... Mi-mi-mi-miauuuu...
Chica Lassamus sa castanza pro oje. Passénzia!
Mussi O Chiche', a andamus a pedire su mortu-mortu?
Chica Ah! Su pedi-cocone... su pane e binu! Eja! Andamus a picare duos pischeddos...
(essin a picare sos pischeddos)
(Chica e Mussi torran chin sos pischeddos e cantan)

Duru duru Tzia Marianna,
aperíela sa janna
a nos dare pane e binu,
ficusicca e pirinzinu
chin sa nuche e sa castanza,
ca non semus zente istranza.

Duru duru Tzia Mariola,
ghettae méndula e nuzola,
papassinos e cocone
chi non siat de chilinzone,
carchi cosa 'e traccheddare
duru duru a nos jocare.