burattini - unità 9

Mimiu, Lillia si brigan

Mimiu (chin sos mustatzos)
Oje est festa... cherjo andare a sa pratta a ballare...
Lillia (intrat chin su muccadore in conca)
O Mimi', e cussos mustatzos?
Mimiu Non so prus unu pitzinneddu deo, so unu pitzoccu mannu!
E tue, ite ses fachende chin cussu muccadore?
Lillia Deo puru non so prus una pitzinnedda.
Ma tue, chin cussos mustatzos, ses lezeddu abberu!
Mimiu Lezu deo?! E tue mi pares una befana!
Lillia Befana m'as nau? E tue ses unu babbarrottu!
Mimiu Unu babbarrottu?! E tue ses un'istria!
Lillia Istria a mimme?! Commo ti lu do' deo! (li dat unu tzaffu)
Mimiu Ah! Gai est? E tando pícati custu! ( li dat unu tzaffu)
Lillia Babbarrottu!
Mimiu Istria! (s'aggantzan)
Boche dae fora Ohi, ohi, pitzinnos malos! Ohi, ohi...
Lillia Mamea! Chie sezis?
Boche So Maria Pettena... commo benzo e bos aggarro!
Mimiu e Lillia Sarbamentu! (si cuban)
(sa boche s'irghelat e Mimiu e Lillia torran)
Lillia Dae, Mimi', torramus in pache...
Mimiu Eja, eja! Nos damus sa manu e jocamus paris!
Lillia (cantande)
Fachimus sa pache, nos damus sa manu...
Mimiu (cantande)
Sa manu nos damus e a inghirju ziramus...
(Mimiu e Lillia cantan)

Ziramus in tundu, ziramus in tundu,
pitzinnos, pitzinnas de tottu su mundu;
chin cara bianca e chin cara iscura,
tottus fizos de mama natura;
malàdios e sanos, famios e tataos,
bene chérfios e abbandonaos.
Nois semus sos frores de custa terra,
cherimus sa pache, timimus sa gherra.
Mutimus sos mannos de tottu su mundu,
nos damus sa manu e ziramus in tundu!