racconti

Su poleddu tontorrone

L'asino

Ascolta l'audio:

In sa bidda de Fonne una borta b'aiat unu poleddu, chi dae cando aiat cumintzau a istare in ancas l'aggradaiat a si che andare a travigare. Sa mama fit sempre pretzetàndelu: "Non t'allarghes dae s'istalla, ca ti podes fintzas pèrdere!".
Ma isse, mudu mudu, si che andaiat girende in sos ortos e in sos pedrarzos de sas tancas. Una die s'est fintzas atrividu a si che artziare, solu solu, a sa costa de su monte Bruncuspina. In cue b'aiat una crabita, belledda che pintura: sa carena sútile e lezera, sos peigheddos lestros comente sa mugra; ma sa conca, pagubbene, fit de craba. Li narat su poleddu:
"A ue ses andende?"
"A brincare in custas rocas; a bi benis?"
"Ma eo no isco a cúrrere lestru comente a tie!"
"E ite crees chi bi cherfat? Pómpia comente fato eo!"
E, chena mancu lu nàrrere, brincat a bolu unu bete e fossu chi b'aiat in cue. Su poleddu pómpiat a buca abberta e li paret unu giogu. Proat a fàghere isse puru sa matessi cosa: ma sos pees si li trobeint a s'imbesse e che ruet a intro tichirriende che porcrabu, in mesu de sos ruos e sas ispinas.
Su poleddu, míseru, abbarrat in su fossu orriende a boghe manna, fintzas chi sa mama e su mere non benint a che lu bogare chin sa soga. Sa crabita, si lu pómpiat dae una roca:
"Ma eo non l'ischio chi su poleddu non bríncat comente una craba!
- narat - Tue, tontu, si ses naschidu molente proite ti cheres fàchere a craba?".

 

Valid XHTML 1.0 Strict