racconti

S'ilixeddu e su fogu

Il leccio e il fuoco

Ascolta l'audio:

Giuanni iat prantau un'ilixeddu in sa tanca de su babbu, a sa parti de sa Serra; ma issu ddi naràt "ilixeddu", comenti chi fessit unu cumpangeddu. Andàt dogna domínigu a ddi donai cara, poita ddi boliat beni, beni meda.
S'ilixeddu cresciat a pagu a pagu, cuntentu de su chi ddi donànt su celu e sa terra: allirgu de s'obrescidroxu a su scurigadroxu e fintzas a su noti asuta de is isteddus, cuntentu de is carignus de su bentixeddu de beranu, de su soli callenti in s'istadi, de s'àcua frisca in atóngiu, de sa ní frida in ierru.
Ma una dí de Làmpadas... agitóriu! A cussa tanca lompit su fogu: bentu callenti cun fragu de fumu... su celu de colori aràngiu e cinixinu... línguas de fogu chi currint che colovrus aintru de sa tanca... in d-unu momentu is matas mannas de suérgiu e de ílixi funt totu allutas, spaciadas, abbruxadas! Issas chi pariant sèmpiri fortis che gigantis!
Giuanni currit, currit a tocheddu de coru a biri: " S'àngiulu de sa guàrdia! Ilixeddu miu... tui puru totu abbruxau! Matixedda bella, frori miu stimau - ddi narat prangendi - chini, chini t'at fatu custu? Aundi funt is follas tuas birdis e su truncu sanu e forti? Ma imoi... imoi nci seu deu a ti fai cumpangia."
Asciutendisí is làgrimas, Giuanni s'ingenugat a su costau de sa matixedda a dd'anninniai, po su sonnu de s'atóngiu e de s'ierru, po s'abetu de su beranu.

Ilixeddu minori

Ílixi miu, ilixeddu minori,
deu t'emu prantau cun amori,
cun amori t'emu prantau,
ílixi miu, ilixeddu istimau!

Ohi manu mala t'at postu su fogu!
E no fiat brulla, nimancu giogu!
Giogu no fiat chi tui, ilixeddu,
imoi ses abbruxau e nieddu!

Cun custu cantu t'agiudu a sanai,
e follas noas as a bogai.
Imoi dormi e abeta beranu,
ílixi miu, ilixeddu galanu!

 

Valid XHTML 1.0 Strict