logo acagliari.it
Depo essire cun sas amigas mias
Diàlogu

Sardu Italianu

Luigi: Nois semus essende, assora... tue depes abarrare in domo cun sorre tua, amus naradu!
Daniele: Cantas bortas mi lu depes torrare a nàrrere?
Marta: Non s'ischit mai chi no l'apas cumprèndidu...
Giorgia: Pro nàrrere sa veridade deo...
Marta: Non t'agiungas tue puru como... pro caridade! Pro ite ses acontzada gasi?
Giorgia: ...Deo fia essende! A ite ora furriades?
Marta: Ite est? Pro ite no as tzunchiadu prima? E a ue dias bòlere andare tue? No lu bides ca est trigadiu?
Giorgia: Semus andende a ascurtare unu cuntzertu...
Luigi: E cun chie ses? Gente fidada?
Marta: E cuntzertu de ite?
Giorgia: Giai b'est su babbu de un'amiga mia... Simona. Mi torrat a acumpangiare a domo issu!
Luigi: Lassa·mi su nùmeru in antis de essire!
Giorgia: Adiosu Daniele... ispàssia·ti! Ahahah
Marta: Faghe a bìdere... tue bestida gasi no essis! In logu prenu de gente... ite as a giùghere in conca!?
Daniele: Ite est? Non ries prus como?
Giorgia: Babbu, potzo essire?
Luigi: Mama tua tenet resone... cussa gunnedda est unu pagheddu curtza!
Giorgia: Ma sas amigas mias si bestint comente bolent...
Luigi: Tue puru, Marta... lassa·la in paghe... pro unu merie chi essit!
Marta: E tue tziti·ti e non ti pòngias in mesu cando naro cosa a fìgia mia!
Giorgia: Tando? Deo esso!
Marta: Apo naradu a ti pònnere cosa còmoda e cumbeniosa!
Giorgia: Ma pro ite depo pàrrere un'ispantamata?!
Marta: Bae ca no... ite ti crees ca s'amiga tua, a tacones e gunnedda curtza est bella meda!?
Giorgia: Si depimus essire... tocat a si bestire bene!
Marta: Si ti pones cussa camisedda noa a frores... as a bènnere a bìdere!
Giorgia: Mh... fia ponende·mi sas iscarpitas nieddas... mi paret ca cussa camisa non b'intrat meda!
Marta: Pone su chi boles! Mai chi m'ascurtes!
Giorgia: Custa bianca cun su frocu est mègius meda!
Marta: Regorda·ti·nde de leare sa giaca, cando essis!
Giorgia: Mi pòngio una giacheta curtza de cotone!
Marta: La' ca b'at a èssere fritu prus a tardu... ma non fias malàida, tue?
Giorgia: Inte', sonadu ant! Depet èssere su babbu de Simona! Nara·li a m'isetare.